Bu gün bütün dünyada əlbəyaxa döyüş növlərinə getdikcə artan maraq və bu idman növünün durmadan artan populyarlığından danışarkən, biz hər dəfə bu istiqamətdə Azərbaycan Universal Döyüş Federasiyasının məqsədyönlü və səmərəli fəaliyyətini də xüsusi qeyd etmişik. Məhz bu fəaliyyətin nəticəsində bu gün ölkəmizdə də əlbəyaxa döyüş növlərinə maraq getdikcə daha çox artır.

Artıq neçə müddətdir ki, SSRİ İdman ustası, Əməkdar Məşqçi, Azərbaycan Respublikası Əməkdar Bədən Tərbiyəsi və İdman Xadimi Azər Həsənovun rəhbərlik etdiyi Universal Döyüş Federasiyasının idmançıları mütəmadi olaraq istər Azərbaycanda, istərsə də xarici ölkələrdə keçirilən mötəbər yarış və turnirlərdə əldə etdikləri qələbələrlə bütün Azərbaycan gəncliyi üçün əsl örnək olurlar.

Həmçinin Federasiya mütəmadi olaraq ölkəmizdə də belə maraqlı yarış və turnirləri keçirməklə əlbəyaxa döyüş növlərinin ən yüksək səviyyədə təbliğini həyata keçirir. O cümlədən 14-avqust 2022-ci il tarixində Bakıda artıq ardıcıl olaraq üçüncü dəfə Peşəkarlar Arasında Reytinq Yarışları keçirilib. Azərbaycan Universal Döyüş Federasiyası, Azərbaycan Peşəkar Universal Döyüş Liqası və “Qartal” Peşəkar İdman Klubunun birgə layihəsi olan bu turnir paytaxtın Novxanı qəsəbəsində yerləşən möhtəşəm AF Hotel-də təşkil olunub.

AİA.Az xəbər verir ki, 7 çəki dərəcəsi üzrə keçirilən yarışda 55 kq Zəfər Abdulrəhmanov (Xaçmaz, “Əhməd Fight Club”); 60 kq çəki dərəcəsində Miradəm İbrahimov (Biləsuvar, “Zəfər” idman klubu); 65 kq çəkidə Məhəmmədəli Nuruşov (Bakı, “Suraxanı Fight Club”); 70 kq çəkidə Rəsul Quliyev (Biləsuvar, “Zəfər Fight Club”); 75 kq çəkidə Mirseymur Musazadə (“Qartal” PİK); 85 kq çəkidə İbrahim Adişov (Biləsuvar, “Zəfər” İK) və +90 kq çəkidə Qəzənfər Namazov (Xaçmaz, “Əhməd Fight Club”) yarışın qalibləri olmuşlar. Turnirin qalibləri həmçinin növbəti beynəlxalq yarışlarda iştirak etmək hüququ verən lisenziya əldə etmişlər.

Qeyd edək ki, Azərbaycan Universal Döyüş Federasiyasının prezidenti Azər Həsənovun rəhbərliyi və “Qartal” Peşəkar İdman Klubunun prezidenti Yaqub İbrahimovun təşkilatçılığı ilə keçirilən bu yarış “Kəhriz” sularının baş sponsorluğu və “Berg” enerji içkilərinin, “Academy Qalib Hazırlıq Kursları”nın, “AF Hotel”in sponsorluğu və AİA.az (Azərbaycan İnformasiya Agentliyi) saytının təşkilati-informasiya dəstəyi ilə keçirilib.