Azərbaycan Mərkəzi Bankının 2021-ci ilin yekunları üzrə maliyyə nəticələri açıqlanıb.

“Bankın sözügedən dövrə cəmi aktivləri 26,411 mlrd manat təşkil edib. Bu isə 2020-ci ilin yekunu ilə müqayisədə 3,6% azdır.

AMB-nin cəmi öhdəlikləri isə illik müqayisədə 5,8% artaraq ötən ilin sonunda 25,240 mlrd manat təşkil edib.

Nizamnamə kapitalı 500 mln manat, kapital ehtiyatları 526,968 mln manat, ədalətli dəyərinin dəyişməsi sair məcmu gəlirə aid olunan qiymətli kağızların yenidən qiymətləndirilməsi üzrə zərəri 40,043 mln manat olan Mərkəzi Bankın bölüşdürülməmiş mənfəəti 412,746 mln manat və ya 69% azalaraq 596,009 mln manatdan 183,263 mln manata enib. Nəticədə, milli bankın cəmi kapitalı illik müqayisədə 27,9% azalaraq 2021-ci ilin dekabrın 31-nə 1,170 mlrd manata enib.

Effektiv faiz dərəcəsi metodu ilə hesablanmış faiz gəlirləri 121,086 mln manat, sair faiz gəlirləri 10,141 mln manat, faiz xərcləri 166,457 mln manat təşkil edən bankın xalis faiz xərcləri 35,230 mln manat təşkil edib. Qeyri-faiz xərcləri 127,516 mln manat olan baş bankın il üzrə zərərri 162,746 mln manat təşkil edib.

Ədalətli dəyərinin dəyişməsi sair məcmu gəlirə aid olunan qiymətli kağızların yenidən qiymətləndirilməsi üzrə il ərzində xalis zərəri 74,372 mln manat, realizasiya nəticəsində mənfəətə və ya zərərə aid edilmiş gəliri 35,394 mln manat olan Mərkəzi Bankın 2021-ci il üzrə cəmi məcmu zərəri 201,724 mln manat təşkil edib.