“Brüssel Azərbaycan və Ermənistandan müsbət mesajlar almaqdadır. Aldığımız mesaj ondan ibarətdir ki, liderlərin bir neçə həftə əvvəl Brüsseldə keçirilən görüşü müəyyən konkret nəticələr verdi. Sərhəd komissiyalarının ilk iclası keçirilib. Sonra kommunikasiya xətlərinin açılması məsələsini müzakirə etmək üçün Moskvada baş nazir müavinlərinin görüşü baş tutdu və liderlər bunu Brüsseldə də müzakirə etdilər. Bu bizi ruhlandırır. Bakının reaksiyası ondan ibarətdir ki, həm Brüssel görüşünün, həm də onun sonrakı gedişatının qiymətləndirilməsi müsbətdir. Beləliklə, kifayət qədər müsbət tendensiya var. Düşünürəm ki, onu inkişaf etdirmək olar”.

Bu fikri Avropa İttifaqının (Aİ) Cənubi Qafqaz və Gürcüstan böhranı üzrə xüsusi nümayəndəsi Toivo Klaar “Azadlıq” radiosuna müsahibəsində deyib.

“Avropa İttifaqı heç bir şeyə müəlliflik hüququ iddia etmir. Biz tərəqqiyə nail olmaq və onu dəstəkləməkdə maraqlıyıq. Düşünürəm ki, Prezident Mişelin (Ermənistan və Azərbaycan) liderləri ilə üç görüşü, eləcə də Prezidentlər Makron, İlham Əliyev və baş nazir Paşinyanla görüşü ilə buna nail ola bildi. Bizim etmək istədiyimiz də budur”, - deyən avropalı diplomat başqa formatların, xüsusən də Moskvada ölkə liderləri səviyyəsində üçtərəfli görüşlərin olduğunu xatırladıb.

Rusiya, Ermənistan və Azərbaycan baş nazirlərinin müavinlərinin Moskvada regionda kommunikasiyaların açılması məsələlərinə dair işçi qrupunun sonuncu görüşünə gəlincə, Toivo Klaar bunları qeyd edib: “Əgər bu, bizi düzgün istiqamətə yönəldirsə, çox yaxşıdır. Axı Avropa İttifaqının yeganə marağı prosesi asanlaşdırmaq və uzunmüddətli hərtərəfli nizamlanmanın əldə olunmasına kömək etməkdir”.

Qarabağ ermənilər məsələsinə toxunan avropalı diplomat hesab edir ki, sonda Qarabağ erməniləri həllin bir hissəsi olmalıdır: “Hesab edirəm ki, hərtərəfli nizamlanma olmalıdır. Münaqişənin necə başladığını hamımız bilirik, nəhayət, birdəfəlik bitməlidir. …Biz münaqişənin hərtərəfli həllinə ehtiyac olduğunu vurğulamışıq və bu istiqamətdə işləyirik”.