Dünən - dekabrın 26-da səhər bir qrup erməninin İrəvanın Respublika meydanından Laçın yoluna doğru başlanan yürüşü Azərbaycanın Laçın rayonuyla Ermənistan arasındakı dövlət sərhədində durdurulub. İştirakçılar Rusiya "sülhməramlı" kontingentinin(RSK) komandiri general Andrey Volkovun müavini ilə görüşsələrdə, o, hayklara Azərbaycan ərazisinə daxil olmağa icazə verməyib.

Moderator.az xəbər verir ki, bu haqda News.am məlumat yayıb.

RSK komandan müavini ilə görüşü təfərrüatlarını aksiya iştirakçılarından biri təqdim edib:

“Biz tələblərimizi irəli sürmüşük. O dedi ki, vəziyyət gərgindir, siz bunu özünüz də bilirsiniz, ikincisi, bizim Qarabağa təhlükəsiz səfərimizi təmin edə bilmirlər. O, xəbərdarlıq etdi ki, kifayət qədər gərgin və təhlükəli vəziyyət yarana, hər şey nəzarətdən çıxa bilər”.

Laçın yolu ilə Xankəndinə gəlməyə cəhd edən erməni qeyd edib ki, Rusiya hərbçiləri onlara yüksək səviyyəli müzakirələrin aparıldığını bildirib və nəticələri gözləməyi təklif edib.

Xatırladaq ki, dünən axşam xəbər verdiyimiz kimi, Rusiya "sülhməramlı"larının komandan müavini, yəni 15 gündür Xankəndi-Şuşa yolundakı Azərbaycan eko-fəallarının qarşısına çıxmayan general Andrey Volkovun müavini Ermənistandan gələn hayklarla özlərinin nəzarət buraxılış məntəqəsində yox, qondarma separatçı-terrorçu rejimin Azərbaycan Respublikasının dövlət sərhədindəki qanunsuz "pasport-nəzarət" məntəqəsində aparır. Və bu, artıq həmin qanunsuz qurumun Rusiya hakimiyyəti tərəfindən faktiki olaraq tanınmasını təsdiqləyən daha bir məqamdır...

P.S. Videodan göründüyü kimi, yaxınlıqda Ermənistan Müdafiə Nazirliyi hərbi polisinin nəzarət məntəqəsi də var...

P.P.S. İşğalçı Ermənistanın da, qondarma separatçı-terrorçu qurumun da Laçın yolu üzərində nəzarət məntəqələri olduğu halda həmin ərazinin halalca hüquqi-tarixi sahibi Azərbaycanın niyə olmasın...