Çağdaş Azərbaycan tarixinin taleyüklü siyasi hadisələrindən biri də 2018-ci il aprelin 11-də ölkəmizdə növbədənkənar prezident seçkilərinin keçirilməsi idi. Prezident İlham Əliyevin verdiyi bu qərar ölkəmizdə hərtərəfli inkişafın yeni keyfiyyət dönəminə qədəm qoymasını şərtləndirmiş, ölkənin demokratik inkişafına əlavə stimul və impuls gətirmişdir. 2018-ci il aprelin 11-də keçirilmiş seçkilərdə Prezident İlham Əliyev növbəti dəfə xalqın böyük dəstəyi ilə parlaq qələbə qazandı. Bu seçkilərin nəticələri xalqın iradəsini əks etdirir. Azərbaycan xalqı görülən işlərə, qazanılan nailiyyətlərə səs verib. Əvvəlki seçkilərdə Azərbaycan vətəndaşlarının mütləq əksəriyyətinin dəstəyini qazanmış Prezident İlham Əliyev növbədənkənar seçkiyə getməklə xalqın yenilənmiş etimadını aparılan siyasətin alternativsizliyinin tədqiqinə, bununla da ictimai məmnunluğu cəmiyyətin modernləşdirilməsinə çevirmək prosesinə meydan açmışdı. Azərbaycan ərazilərinin uzun illər boyu davam edən işğalına tezliklə son qoymaq üçün dövlətin daha da gücləndirilməsinə, ölkə daxilində islahatları sürətləndirərək çevik idarəetmənin qurulmasına əmin olmaqdan ötrü növbədənkənar Prezident seçkilərinin keçirilməsi zəruri idi. Qədirbilən xalqımız Prezident İlham Əliyevə hər zaman etimad göstərməklə bilavasitə ölkəmizdə görülən misilsiz işləri, uğurlu daxili və xarici siyasəti, peşəkar idarəçiliyi yüksək qiymətləndirmiş olur.
Azərbaycanda aparılan islahatlar, həyata keçirilən mühüm tədbirlər ölkə vətəndaşları ilə yanaşı, beynəlxalq ictimaiyyət tərəfindən də böyük maraqla izlənilir və müxtəlif beyin mərkəzləri tərəfindən yüksək qiymətləndirilir. Eyni zamanda, Azərbaycan dünyanın ən çox islahat aparan ölkəsi elan olunub.
Vətən və xalq qarşısında Prezident İlham Əliyevin ən böyük xidmətlərindən biri də qüdrətli və müzəffər Ordunun yaranmasıdır. Müasir ordu quruculuğu istiqamətində atılan vacib addımlar Azərbaycan Ordusunu dünyanın ən güclü orduları sırasına daxil etdi. Müzəffər Ali Baş Komandan, böyük sərkərdə İlham Əliyevin 19 illik gərgin əməyinin nəticəsində formalaşan güclü Ordumuz 30 il işğal altında qalan torpaqlarımızı 44 gün ərzində azad etdi, ölkəmiz öz ərazi bütövlüyünü təmin etdi. Bu gün xalqımız dünyada mübariz, döyüşkən və müzəffər xalq kimi tanınır”.
Hazırda doğma Qarabağımızda yenidənqurma, bərpa, abadlaşdırma işləri sürətlə aparılır. İşğaldan azad edilmiş ərazilərdə məsələlərin mərkəzləşdirilmiş qaydada həlli məqsədilə dövlətimizin başçısı tərəfindən yaradılmış Əlaqələndirmə Qərargahı bu istiqamətdə mühüm işlər aparır. Yeni infrastrukturun yaradılması ilə yanaşı, bir çox dövlətlər üçün nümunəvi hesab olunan müasir idarəçilik modelinin tətbiqi işğaldan azad olunan ərazilərimizi ümumən regionun yeni inkişaf mərkəzinə çevirməkdədir.
Bu gün Azərbaycan xalqı öz liderinin ətrafında sıx birləşərək ona sonsuz etimad, inam, dəstək nümayiş etdirir və bu da təbiidir, çünki, cəmiyyətimiz Prezident İlham Əliyevi vətənpərvərlik, qətiyyət, əzm, prinsipiallıq və dönməzlik rəmzi olaraq görür.



Müzadil İbrahimov,
Salyan rayon Çuxanlı kənd inzibati ərazi dairəsi üzrə nümayəndə