Prezident İlham Əliyev cari ilin 11 iyul tarixində İslamabadda dövlət səfərində olmuşdur. Səfər zamanı prezident İlham Əliyev, hər iki ölkə arasında olan qardaşlığın xalqlarımızın yüzillərlə bundan əvvələ təsadüf edən, bir-birinə olan dərin hisslərinə əsaslandığını qeyd etmişdir. Azərbaycana gələn pakistanlıların sayı son illər ərzində daha da artıb və Bakı-İslamabad, Bakı-Kəraçi, Bakı-Lahor arasında birbaşa uçuşları artıq müzakirə olunub. Pakistan ilə Azərbaycan hər işdə, istənilən beynəlxalq təsisat daxilində, hər beynəlxalq məsələdə bir-birini dəstəkləyir. Cəmmu və Kəşmir məsələsində ölkəmizin birmənalı dəstəyi qardaşlığımıza, eləcə də beynəlxalq hüquqa olan sadiqliyin göstəricisidir. Kəşmirlilərin hüquqları onilliklər boyu diqqətdən kənarda qalmış, pozulmuşdur. BMT Təhlükəsizlik Şurasının qətnamələri məsələnin necə həll olunmasını aydın şəkildə təsvir edir.
Biz Azərbaycan xalqı olaraq yaxşı bilirik ki, işğal dövründə Pakistan hər zaman yanımızda olan bir sıra ölkələrdən biri olmuşdur. İkinci Qarabağ müharibəsi – Vətən müharibəsi zamanı siyasi dəstək və Azərbaycanın haqlı mövqeyini dəstəkləyən Pakistanın yüksəkrütbəli rəsmilərinin birmənalı bəyanatları bizə əlavə güc-qüvvət verdi. Pakistan məhz işğala görə Ermənistanla diplomatik münasibətləri qurmayan ölkədir. 2020-ci ilin noyabrında Qələbəmizi qeyd etdiyimiz zaman xalqımızın əllərində Azərbaycan, Pakistan və Türkiyənin bayraqları var idi. Bu, bizim münasibətlərimizi unikal edir. Güclü tərəfdaşlıq əlaqələri siyasət müstəvisində, habelə iqtisadiyyat, ticarət və sərmayələr sahələrində də qurulacaq ki, bu da ölkələrimiz arasında əməkdaşlığın şaxələnməsi deməkdir. İlkin mərhələdə güzəştli ticarət formatına aid 9 maddə müəyyən olunub. Bu isə, yalnız başlanğıcdır. Lakin hazırda biz ticarət, sərmayələr, sənaye, energetika, daşımalar, nəqliyyat dəhlizləri kimi sahələrin praktiki elementlərinə qədəm qoyuruq.