Şabran rayon İcra Hakimiyyətinin başçısı Asif Hüseynov rayon sakinləri üçün əlçatmaz olub. Onu kabinetində tapmaq belə müşkül məsələyə çevrilib, sakinlərin icra başçısı ilə görüşmək Çin səddini aşmaqdan çətindir.

Bu barədə redaksiyamıza Şabran sakinlərindən məlumat daxil olub.

İddia olunur ki, A.Hüseynov hətta rayonda keçirilən dövlət səviyyəli tədbirlərdə görünməyə ərinir, İcra Hakimiyyətinin rəsmilərinin xeyli xahiş və minnətindən sonra tədbirlərə qatılır. Kabinet ona dar gəldiyindən vətəndaş qəbulunu müavinlərinə həvalə edib. Ancaq xüsusi görüş və qəbullarını rayonun Gəndob kəndində yerləşən “Xəzər” restoranında həyata keçirir. Elə çox vaxt naharını da orada edir və elə oradan da birbaşa paytaxta üz tutur. 3-4 gün ərzində o, İcra Hakimiyyətinin inzibati binasında 3-4 saat ya ola, ya olmaya. Həmin vaxtı da kənar şəxsləri qəbul etmir, ancaq öz işçilərindən hesabat alır. Hətta işçilərin əmək haqlarının verilməsi günlərlə yubanır. Ona görə ki, başçı işdə tapılmadığından lazımı sənədlərə möhür vurulmur.

A.Hüseynov gözdən pərdə asmaq üçün hərdən peyda olur, rayon kəndlərini gəzir, qəbul prosesi həyata keçirir, amma necə, vətəndaşdan çox ora məmurlar toplanır, ön sırada İcra Hakimiyyətinin, kənd nümayəndəliyi, bələdiyyə işçiləri əyləşirlər. Arxada 3-4 oturacaqda da vətəndaş. Bu da oldu onun kəndlərdə sakinlərlə görüşü. Bu görüşlərdən ancaq bol-bol fotolar çəkilir. Nə problem həll olunur, nə dəstək, nə qayğı…

Sakinlər iddia edirlər ki, A.Hüseynov özünü qanundan üstün tutur. Rayonun vəziyyətinə gəldikdə isə, bərbad. Heç bir inkişaf, tərəqqi, abadlaşma, quruculuqdan söz gedə bilməz. Şabran çirkabın içində boğulur. Başçı işinin başında olmadığından rayonun vəziyyəti ilə maraqlanmır. Altı ildir bu vəzifədədir, heç altı dəfə şəhərin küçələrində onu sakinlərlə görüşü olmayıb. Rayonda onu tanıyanları barmaqla saymaq olar, onlar da İcra Hakimiyyətinin işçiləridir, sadə şabranlıya onun üzünü görmək qismət olmur.

Söylənilən iddialarla bağlı Şabran rayon İcra Hakimiyyəti ilə telefon əlaqəsi saxlamaq mümkün olmadı.Qarşı tərəfin də mövqeyini dərc etməyə hazırıq.azreform.info



Şabran Rayon İcra Hakimiyyəti:

Bildiririk ki, ilin əvvəlində təsdiq olunmuş qrafikə əsasən vətəndaşlar hər həftənin çərşənbə günü saat 09:00-dan etibarən Şabran Rayon İcra Hakimiyyətinin inzibati binasında qeydiyyatdan keçərək Şabran Rayon İcra Hakimiyyətinin başçısı Asif Hüseynovun qəbulunda iştirak edirlər. Qəbullar Şabran Rayon İcra Hakimiyyəti başçısının müavinləri, Rayon İcra Hakimiyyəti başçısı Aparatının şöbə müdirləri, eləcə də yerli idarə və müəssisələrin rəhbərlərinin iştirakı ilə keçirilir. Vətəndaşlar fərdi şəkildə qəbul edilir, problemləri, istəkləri və şikayətləri dinlənilir, onların həlli istiqamətində aidiyyatı şəxslərə tapşırıqlar verilir və bu tapşırıqların icrası nəzarətə götürülür.
Əlavə olaraq qeyd edək ki, Şabran Rayon İcra Hakimiyyəti başçısının ayda 4 dəfədən az olmamaq şərti ilə yerlərdə səyyar qəbulları keçirilir. Hər ay üçün tərtib olunan qrafikə uyğun olaraq Şabran Rayon İcra Hakimiyyətinin başçısı Asif Hüseynov rayonun bütün yaşayış məntəqələrində səyyar qəbullar həyata keçirir. Bu səyyar qəbullarda da aidiyyəti rəhbər vəzifəli şəxslər iştirak edir. Sosial şəbəkələrdə paylaşılan eyni məzmunda olan mətndə qeyd olunan digər məsələlər həqiqəti özündə əks etdirmir, əsassız olmaqla böhtan xarakteri daşıyır.