28 May – Azərbaycan xalqının azadlıq və müstəqillik uğrunda göstərdiyi iradənin və əzminin parlaq təcəssümüdür. 1918-ci ildə yaradılan Azərbaycan Xalq Cümhuriyyəti qısa müddətdə olsa da, demokratik dəyərlərə əsaslanan dövlətçilik ənənələrinin əsasını qoydu.
1991-ci ildə Azərbaycan öz istiqlaliyyətini bərpa etdi. Lakin bu müstəqilliyin qorunması və möhkəmləndirilməsi olduqca mürəkkəb və təhlükəli bir dövrə təsadüf edirdi. Ölkədə xaos, siyasi sabitsizlik və xarici təhdidlər Azərbaycan dövlətçiliyi üçün real təhlükə yaradırdı.
Çətin siyasi-iqtisadi dövrdə hakimiyyətə qayıdan Ulu Öndər Heydər Əliyev Azərbaycan dövlətçiliyinin qorunması üçün qətiyyətli tədbirlər gördü, ölkədə davamlı ictimai-siyasi sabitliyi bərqərar etdi. Müstəqilliyin əldə edilməsi mürəkkəb bir proses olsa da onu qoruyub saxlamağın daha çətin, məsuliyyətli olmasını zamanla baş verən siyasi proseslər bir daha sübut etdi. Məhz belə bir şəraitdə xalqın təkidi ilə hakimiyyətə gələn Ulu Öndər dövlətimizin və dövlətçiliyimizin xilaskarı oldu. Hər şeydən öncə ölkədə əmin-amanlığın inkişafı üçün geniş imkanlar yarandı. Qısa zamanda cinayətkarlığın qarşısı tam alındı, özbaşınalığa səbəb olan bütün qanunsuz silahlı dəstələr ləğv edildi. Dövlət rəhbərliyinin böyük zəhməti hesabına yaranan ictimai sabitlik, cəbhədə əldə olunan atəşkəs respublikanın inkişaf kursunu müəyyən etməyə imkan verdi. Bu da dövlət quruculuğu prosesinin uğurla aparılmasına geniş şərait yaratdı. Ən başlıcası isə odur ki, Ulu Öndərin siyasi təcrübəsi suverenliyimizin qorunub saxlanılmasında, müstəqil dövlət təsisatlarının yaranmasında və dövlət quruculuğu prosesində böyük rol oynadı. Müstəqil Azərbaycanın beynəlxalq hüquq normalarına uyğun ilk Konstitusiyası referendum, yəni, ümumxalq səsverməsi yolu ilə qəbul edildi. Bir sözlə, yalnız ümummilli liderimiz Heydər Əliyevin hakimiyyətə qayıdışından sonra milli-mənəvi sərvətlərimizə, dilimizə, dinimizə, tarixi irsimizə qayğı dövlət siyasəti səviyyəsinə qaldırıldı.
Ulu Öndər Heydər Əliyev siyasi kursunu uğurla davam etdirən cənab Prezidentimiz İlham Əliyev 2003-cü ildə Azərbaycan Respublikasının Prezidenti seçildiyi ilk gündən ölkənin yeni inkişaf konsepsiyasını ortaya qoydu. Müstəqil ölkə olaraq Azərbaycanın dünya ölkələri sırasında layiqli yer tutması, söz sahibi olması, daim artan nüfuzu məhz onun uğurlu siyasətinin nəticəsidir. Bu gün Azərbaycan Bayrağının işğaldan azad olunmuş Qarabağımızda – Cəbrayılda, Füzulidə, Zəngilanda, Qubadlıda, Şuşada, Ağdamda, Kəlbəcərdə, Laçında, Ağdərə, Xocalıda, Xocavənddə, Xankəndidə dalğalanması Azərbaycan Prezidenti İlham Əliyevin gələcək nəsillərə unudulmaz dövlətçilik əmanətidir.
Cənab Prezidentimiz İlham Əliyev 8 noyabr 2020-ci ildə Şuşanın işğaldan azad edilməsi müjdəsini xalqa çatdırarkən ata vəsiyyətini yerinə yetirdiyi üçün özünü xoşbəxt hiss etdiyini bildirdi. Bu gün hər bir Azərbaycan vətəndaşı Ulu Öndər Heydər Əliyevin qurucusu olduğu, cənab Prezidentimiz İlham Əliyevin tarixi qələbə qazandırdığı azad, müstəqil və bütöv Azərbaycan torpaqlarında yaşadığı üçün qürur duyur.