Gəlmişəm dünyayə ta eşqində məcnun könlümə
Sən kimin leyla tapam eşqindi məzmun könlümə

Yeddi dövlət mən dəli divanəni azad qoyub
Hökmünə fərman verilməz yoxdu qanun könlümə

Ya Əli bəzmində sənsiz damcı mey yetməz mənə
Zaye zillindən gələn mim mey verib nun könlümə

Aşiqəm eşqin qərarın sən verən gündən varam
Yer göyün hökmündə varlıq qaldı məmnun könlümə

Məst edən saqı,əzəl meyxanənın mə'murisən
Verməsən ta məst olam qəmdir şəbixun könlümə

Bir nəzər qılsan olar,çün kayınat ovcumda mum
Mat qalar aləm bütün eşqimdə məftun könlümə

Hu Əli mövla mədəd eşqin yaşıllıq rəmzidir
Yar sevən yahu üçün dərmandı yorqun könlümə

Sir bilən sərdən keçər,sirrin numayan eyləməz
Gər dilim diş durmasa olmuş nə mədyun könlümə

Mürşüdün həq nəğməsindən doldu ilham badesi
Gör nə toxdaqliq verir əhvalı pozğun könlümə

Elmanam mövlam yəqin, eylər kərəm mən sayilə
Min barat həqdən verər sevdalı məhzun könlümə

O.D.ELMAN