Prezident İlham Əliyev 3 noyabr tarixində Azərbaycan Milli Elmlər Akademiyasının 80 illik yubileyinə həsr olunmuş yığıncaqda çıxış edib. Dövlət başçısı çıxışında akademiyanın 80 il ərzində böyük yol keçdiyini, Azərbaycan elminin inkişafında aparıcı rol oynadığını vurğuladı. Geridə qalan bu illər ərzində müxtəlif ictimai-siyasi rejimlərdə yaşasaq da, Azərbaycan hər zaman öz elminin inkişafına böyük diqqət yetirirdi. Dövlət başçısı çıxışında Ulu Öndər Heydər Əliyevin hər zaman Azərbaycan alimlərini dəstəkləmək üçün öz səylərini əsirgəmədiyini də qeyd etdi. Hələ ötən əsrin 70-ci illərində onun rəhbərliyi ilə Akademiyanın fəaliyyəti təkmilləşərək bir neçə yeni elmi-tədqiqat institutu yaradıldı, elmin inkişafına böyük vəsait ayrıldı. Faktiki olaraq Ulu Öndərin bu siyasəti müstəqillik illərində də davam etdirilirdi. Onun təşəbbüsü ilə keçən əsrin 70-ci illərindən başlayaraq yüz minlərlə Azərbaycan gənci o vaxt Sovet İttifaqının aparıcı ali məktəblərinə göndərilmiş, beləliklə, ölkəmizdə intellektual potensial daha da gücləndirilmişdir. Eyni siyasəti biz müstəqillik illərində də aparmağa davam edirik. Bu gün də on minlərlə Azərbaycan gənci artıq dünyanın aparıcı ali məktəblərinə ezam olunaraq böyük əksəriyyəti oxuyub Vətənə qayıdırlar və beləliklə, ölkəmizin inkişafına öz dəyərli töhfələrini verirlər.
Müstəqilliyin ilk illəri bildiyimiz kimi çox ağır və faciəvi idi. O vaxt məhz Heydər Əliyevin qətiyyəti, iradəsi, xalqa olan bağlılığı bizi böyük bəlalardan qurtarmışdır. Onun hakimiyyətə qayıdışından sonra Azərbaycan ziyalıları ilə, Azərbaycan ictimaiyyəti ilə ilk görüşünün məhz 1993-cü ildə Milli Elmlər Akademiyasında olması da böyük göstəricidir. Beləliklə, o, bir daha müstəqil Azərbaycanın prioritetlərini açıq şəkildə bəyan etmişdir. Düzdür, o vaxt bizim maliyyə imkanlarımız çox məhdud, xəzinəmiz isə, demək olar ki, boş idi. Azərbaycan böyük humanitar fəlakətlə üz-üzə idi. Bir milyondan çox qaçqın və məcburi köçkün, torpaqlarımızın işğal altına düşməsi və çox böyük iqtisadi, maliyyə çətinlikləri olmasına baxmayaraq, yenə də Akademiyanın işinə, Akademiyanın qorunmasına, alimlərin fəaliyyəti üçün vəsait ayrılırdı.
Təbii ki, illər keçdikcə, Azərbaycan inkişaf etdikcə bu vəsait daha böyük həcmdə ayrılmağa davam edir. Son on il ərzində Azərbaycan elminə ayrılan vəsait iki dəfədən çox artmışdır.