2020-ci ilin 8 noyabrı Azərbaycan tarixində əbədi Zəfər günü kimi qalacaq. Həmin gün Prezident, Müzəffər Ali Baş Komandan İlham Əliyev Şəhidlər xiyabanında Azərbaycan xalqına müraciət edərək böyük qürur və fəxarətlə Şuşa şəhərinin işğaldan azad olunduğunu bəyan etdi.
Bu xəbər minlərlə şəhidin qanı, xalqımızın illərlə davam edən mübarizəsi və Ordumuzun qəhrəmanlığı ilə qazanılmış möhtəşəm Qələbənin rəmzinə çevrildi. Prezidentin səsi o gün təkcə Bakıda deyil, bütün Azərbaycan boyu, hər bir azərbaycanlının qəlbində Zəfər nidasi kimi əks-səda verdi:
“Şuşa azaddır! Şuşa bizə qayıtdı! Bu, Zəfər günümüzdür!”
Bu sözlər təkcə bir şəhərin azad olunması deyil, bütün Qarabağın, Azərbaycan torpaqlarının azadlıq səlnaməsinin başlanğıcı idi. Şuşa uğrunda döyüşlər Azərbaycan əsgərinin rəşadətini, Ordumuzun gücünü və xalqın birliyini bir daha göstərdi.
Prezident İlham Əliyevin rəhbərliyi ilə Azərbaycan Ordusu 44 gün ərzində misilsiz qəhrəmanlıq nümunəsi göstərərək illərlə işğal altında qalmış torpaqlarımızı azad etdi. Şuşa əməliyyatı isə bu Zəfərin zirvəsi oldu.
Şəhidlər xiyabanından gələn həmin səs — Şuşanın azadlığı xəbəri — bir millətin ruhunu ayağa qaldırdı. Azərbaycan xalqı həmin günü göz yaşları, dua və qürurla qarşıladı. Bu, ədalətin, milli birliyin və Heydər Əliyev siyasətinin Zəfəri idi.
Bu gün Şuşada Azərbaycan bayrağı ucalır, muğam sədaları səslənir, məscidlərdə azan oxunur. Bu mənzərə Ali Baş Komandanın və xalqımızın qətiyyətinin təntənəsidir.
8 Noyabr – Zəfər Günü hər il böyük qürurla qeyd olunur. Bu tarix Azərbaycan xalqının birliyinin, Prezident İlham Əliyevin müdrik rəhbərliyinin və Azərbaycan Ordusunun igidliyinin əbədi simvoluna çevrilmişdir.