Azərbaycan Avropa İttifaqı (Aİ) ölkələrinə təbii qaz tədarükünü genişləndirməklə bağlı danışıqlar aparır.

Bunu Prezident İlham Əliyev "Sülhün təşviqində medianın missiyası: Həqiqətin bərpası və etimadın yenidən qurulması" mövzusunda keçirilən IV Şuşa Qlobal Media Forumunun açılış mərasimində bildirib.

"Biz bu ildən Avstriya və Almaniyaya qaz ixracına başlamışıq. Bu, bizim ümumi strategiyamızın tərkib hissəsidir ki, Avropa və qlobal bazarda mövcudluğumuzu gücləndirək. Avropa bazarı premium bazardır, ən yaxşı qiymətlər ordadır və təbii ki, biz orada öz imkanlarımızı genişləndirməkdə maraqlıyıq. Bəli, biz artıq 16 ölkəyə boru kəmərləri ilə qaz nəql edirik. Bu baxımdan bu göstərici üzrə biz dünyada birinci yerdəyik və bu imkanlar genişləndiriləcək. Biz Avropa İttifaqının digər üzvləri ilə də danışıqlar aparırıq. Həm təchizatın başladılması, həm də həcmlərin artırılması ilə bağlı danışıqlar gedir, bununla bağlı müraciətlər var. Bu gün Azərbaycan etibarlı tərəfdaşdır, proqnozlaşdırıla bilən mənbədir və bizim 10 il bundan öncə ilə müqayisə etsək, rolumuz daha vacibdir", - deyə o qeyd edib.

Bundan başqa, dövlət başçısı deyib ki, "mavi yanacaq" hasilatını artırmaq üçün müvafiq işçi proqram tərtib edilib və sərmayə portfeli yaradılıb: "Eyni zamanda, bərpa olunan enerji ilə bağlı işlər görülür. Bunun sayəsində biz qaza qənaət edəcəyik. 2032-ci ilə qədər biz bərpa olunan enerjinin həcmini 8 giqavata çatdıracağıq və bu, bizə ildə 2-3 milyard qaz qənaət etməyə kifayət edəcək. Bu gün həmin qaz elektrik enerjisinin istehsalı üçün sərf edilir. Yəni bu iki vacib faktor: qaz hasilat portfeli və profili genişləndirilir və lazımi olan bazar var. Və biz burada nəqliyyat infrastrukturunu genişləndirməliyik. Bizim qaz infrastrukturumuz 2022-ci il Rusiya-Ukrayna müharibəsindən əvvəlki dövrə uyğun tərtib edilib. O zaman bizim proqnozlarımız və strategiyamız ondan ibarət idi ki, biz hasilat prosesini uzadaq və bu həcmləri sabit saxlayaq, və ya daha çox sərmayə qoyaq və daha çox qaz hasil edək. Ancaq müharibə başlayandan sonra Azərbaycan qazına olan tələbat kəskin artdı. Avropa Komissiyasından bizə müraciət edildi ki, Azərbaycan əlindən gələni etsin ki, biz hasilatı artıraq. Biz buna nail olduq. Xanım Fon der Lyayen səfəri zamanı rəqəmlər səsləndirildi. Biz 2022-ci illə müqayisədə Avropa İttifaqına ixracı 65 % artırdıq və bu rəqəm getdikcə artacaq. Yəni, mövcud nəqliyyat infrastrukturunun genişləndirilməsi vacibdir".

Onun sözlərinə görə, burada problemli məsələ Avropanın yaşıl gündəliyidir və Avropa bankları bu gün yanacaq enerjisinə sərmayə qoymaq istəmir: "Ona görə sual yaranır ki, bunun üçün maliyyə resursları haradan əldə edilməlidir? Digər məsələ isə, əlbəttə, bu daha da yəqin ki, vacibdir, uzunmüddətli müqavilələrdir. Bunu da biz xanım Fon der Lyayenlə müzakirə etdik. Bizə uzunmüddətli kontraktlar lazımdır. Bizin hasilatı kəskin şəkildə artırmaq üçün böyük sərmayəyə ehtiyacımız var və hansısa bir mərhələdə bizə deyilsə ki, "sağ olun, artıq sizin qazınıza ehtiyacımız yoxdur", bu, qəbul edilməz olar. Bir də ki, şaxələndirmə məsələsi var. Biz əvvəlki illərdə heç ağlımıza gələ bilməyən bazarlara qaz nəql edirik. Məsələn, Suriyaya qaz nəql edirik. Yəni biz Suriyadan qonşu ölkələrə də keçə bilərik, orada da böyük tələbat var. Yəni, Avropalı tərəfdaşlarımız ilə təmaslarımızda biz onu, mesajı çatdırırıq ki, bizim uzunmüddətli müqavilələrə ehtiyacımız var və birgə səy göstərərək qaz nəqli sistemini genişləndirməyə ehtiyac var. Və Avropa Komissiyası ilə münasibətlərdə, mən artıq bunu qeyd etdim, biz bu əməkdaşlıqdan çox məmnunuq və həmin təşkilatın liderlərinin tez-tez ölkəmizə səfər etməsi də görünməmiş bir işdir. Çünki mart ayından iyul ayına qədər Avropa Komissiyasının prezidenti, Avropa İttifaqı Şurasının prezidenti, diplomatiyanın rəhbəri və bütün bu səfərlər çox uğurlu idi, nəticələr çox yaxşı idi. Biz müfəssəl danışıqlar, müzakirələr apardıq, təkcə ikitərəfli məsələlər deyil, eyni zamanda qlobal səviyyədə cərəyan edən proseslərlə bağlı da müzakirələr apardıq".